موضوع: حرب الاركيله ..شعراء الصومعه الأربعاء 17 مارس 2010 - 15:00
حرب الاركيله ..
انها ليلى الحسن .. لا غرابة .. لا عجب .. لا تهدأ ، لا تمل من المرح و الهرج ، خبيرة بالمشاغبة ، و بالمشاكسه، تتقن كل أساليب " الحركشه" و تعرف كيف " تخترع الفكرة" لتشغلنا بحرب القوافي .. و كلما هدأت الحرب و توقف اطلاق الرصاص ، تشعلها..و يبدأ "هبج المدافع" .. في سهرة أمس كانت آخر ابتكاراتها في نقمتها المتواصله على " الاركيله " و هي تعرف أن بعض شعراء الصومعة لا تتفتح عبقرياتهم في الارتجال الا في "سهرة اركيله " و منهم زوجها مالك، فقالت في " ضرتها " الأركيله ما معناه :
كلك مَضَره مأكدي و شربك حـــرام بتسرقي من الجسم شي ما بينسرق شو مضيعا اوقـــــــات شعار الكرام و العبقري بنارتك عقلو احـــــــترق
لبيبه مؤيده لليلى:
كلها مرض على مرض ، دخانها يعمي العيون، غمامها يخنق الصدور، رائحتها تزكم الأنوف ، منها "السعله" تزعج الجيران و تحرمنا من النوم.. و بتتلف الدماغ و بتوسخ الدم بالنيكوتين .. الخ .. الخ ..و فرجونا براعتكم ..
ردود شعراء الصومعة :
زياد:
اركيلتي رفيقـة اللحظه الهاديـــة ع راسها من النور شعله بــاديـه مش متلك بتحرق العقل بلا سبب الجمره بعيني متل شمس الغاديه
وسيم:
اركيلــة الاحساس مصدر للوحي بترسم غمامه صعب انها تنمحي ما بتشكي بالعكس بتخلي المزاج رايق ع طول الهــم منو بيستحي
أيوب:
يللي الهموم بتحملي بساعة غضب جمعتي ما بين المي و شفار اللهب أحلى تناقض فلسفه بدنيا العقــــول البيدخنـــــك ما بيرتجي خمر العنب
نزار:
صوتك موسيقى و القلب طالب نغـم عندك اليقظه و السهر فيكي انغــرم بفصل الشتي بتقصري الليل الطويل و بتلهمي بالشاعر نبـــــــــوغ القلم
ابو الحب الذي لا يدخن:
بأركـــــــــــيلتي طلة حبيبه بشوفها و عقلي الذكي ما بيحترق بشغوفها بالعكس بتضوي رغــــم كتر الظلام تمنيت اقـــــــــــــدر رد ع معروفها
هايل:
فيكي التواضع ما ترك عنـــدي شكوك من حيث انت للعبـــيد و للملــــــــــوك ما بتفرقي المحتاج عن صاحب قصور ان كنو فقـــــير الحال او صاحب بنوك
مالك ، اركيلته ضرة زوجته:
كل العطف منها لقيتو بجـــــــــــيرتي و " ضرتك" بتظـــــــل تحفـظ قيمتي و رفيقـــــــتي كل الوفـــــا بقاموسها حـــــاجي تـْنـِّقي "خوختي " اركيلتي
الجميع يضحك ....
قصيد ابو الحب ( لا يدخن) و لكن ضد ليلى و لبيبه يعدد محاسن الأركيله و يكرر فتيا عن التبغ والتنباك : = اذا كان حلالاً فشربناه و اذا كان حراماً فاحرقناه= قال :
تذكـــر يـــا صديقي ان كنت ناسي بكتـر "النـق" شــو وجعت راسي
من الدخـــان عــــــــم تعمل قضيه و تا رد عليك في عــندي حماسي
أنا اركـــــــــيلتي الحلوه الشـقــيه بليل الهـــــــــــم بترافــق حواسي