مكتوب من الضيعه
اختلاف يا عدنان ..
يا بو خليل:
يا بو خـــليل الثلـــــــج ضيعــــتنا غمر
و النـار عـــم تلعب بحضن الموقــــدي
و بتشوف حد الموقــــدي محلا السهر
لمـــــــــا الشِعر بين الشـــباب بيبـتـدي
سُــــمعان مش سَمعان شو قـلو رئيـف
قـــلو أنت بالشعر مش قـــــــد المــقام
و من ردتـــك بينت بالمعنى ضعـــــيف
و مهـما تغني ما الــــــو معنى الكـــلام
لكن بــــــو طافش هالاهـــــانه ما حمل
و جــــاوب بـرده عـــنف كانت كافــيه:
نحــــنا بنعــــرف كــــــيف بتركب جُمَل
بتكسر الـــوزن و مـا بتتـــــبع قافــــيه
و حتى ما تعلق مشكله المخـــتار قـــال
احتكمو عند (عدنان موسى) يا شــباب
معروف عـــــــنو شاعر بأوسع مجــال
روحو لعندو و ارجعــــو معكم جـــواب
و لمــــــــا سمع عدنان شو قالو التنين
تضحَّـك و قـلن هـــــــــيك قصه مفسره
سُمعان شــــــعرك متل دعس دجاجتيـن
و جايــــب يا بو طافش قصيده مكسره
من كــتر نـدف الثلج ع سطوح البيوت
تعـــــبو المحادل و الدلـــف بلش نزول
المزراب ما بطـَّل حكي وعاف السكوت
زخ الشتي بالليـــل ما وقـّف هطـــــول
مبارح من المكسيك وصَّل بو فـــــريـد
و ســــــــــماع منو الأســبانية مكسره
هــــــــوي بيحكي و ما حـدا فاهم أكيد
و قــال يوسف كل حكيـــــــــو مسخره
"جفصه بنت جهجاه" قبل بليلتــــــين
من عرسها ما عاد بــــــدها هالـزواج
ما عـرفت شو اللي صار بين العيلتين
و ع رفضها (نحنوح) عـامل احـتجاج
من بيت بو شملان كان طــــالع سليم
زعـــــلان عارو الرفش قــال مضيعو
راح لعند بو الياس يشكي " لحلــيم"
قلو "القــــــــــزي" ليش تتعامل معو
يمكن "نـــــــديم عبود" صابو اكتئاب
عم يلعن الايــــــــام و الحـظ التعـيس
قاعــــــد لوحـدو يندب سنين الشباب
مــــــا في صبيه بتقبلو إلهـا العريس
حابب زيــــاره روح ل "دنيا الوطن"
و احكي طـــرائف شعر عن شعارهــا
لكن ما بـــــــــــدنا تجهزو النا كــفـن
و تشعل حروب و نحترق بنـــــــارها