موضوع: عام سعيد للجميع .. شعر ابو الحب وزياد ابو لطيف الخميس 7 يناير 2010 - 14:38
مكتوب من الضيعه
زياد أبو لطيف
يا بو سعيد
يا بو سعيد بعـــــْـيدك و اليوم عيد و بساحـــة العين الشباب تجمعـــو كل واحـــــــد لابس الطقم الجــديد إلا "جبص" تا يشتري ما في معو
حزت بنفسي كثير و الرب العليــم ورحت اشتريتلو طقم من بـوهـلال كيف عنـّا عــــــيد و بننسى اليتــيم و الناس كل الناس للخالق عـــيال
كنيسة مار مخـايل تـْعِـب و تنتـلي يمكن "أبونا "مش مجهز عالأكـيد "القربان"ما كفى وع كـتر البلبلي نرفــــز أبونا و طلعت الفله بفـريد
و قالو ابن فـدعـوس راجع مكتفي ضيَّـــف ملبس مع قـضامي بسكره ما ع الأساس أنقــال عــنو مختفي و خمن ابن عمو الورثــة مسوكره
عويجان مش ممنون من خيو حبيب عــنو حكي قــدَّام جـــــارو بو حسن المختار قـال : تباوسو، و قلن أديب صار فــينا نــقـول" صافي يا لــبن"
مَنـُّو عا بعضو شفت عـمك بو نعيم الحكيم عن أكل الحــــــــلاوه مانعو و بسهرة مبارح ما قـدر كمّل سليم وسمعان عم بيقول ضرسو واجعو
برهــوم عينو حــط ع سلوى أنيس و لليـــوم مــــــا قبلت وساطه أمها يمكن ببـــــــالا للبنت عملت عريس بـــدها تزوجها و ما تحمل هــــمها
ملاحظه: منعاُ لأي التباس "و الناس كل الناس للخالق عيال" أخذ المعنى من الحديث النبوي الشريف: = الخلق كلهم عيال الله و أقربهم الى الله أنفعهم لعياله= ========
مكتوب من الغربه أبو الحب:
يا بو خليل
بالبيت يا جار الرضا عــــــم الفرح لـما أمام البيت شــفت البوسطجي مرسالك تسلمت و القــــلب انشرح و غير تبقو بخير ما عـــم نرتـــجي
رغـم الثلج و البرد و جليد الطريق أهـــــل ضيعتنا التقو و ما تباعــدو بالحفل كــــــنا مثل ماضينا العـريق بجمعية الضيعه الجمـــيع تعايـــــدو
وملهب أبو طعان من أعلى الشمال جـــايب ألاسكا و البـــرد كلو معـــو و لما ع ادمنتون وصل كانو العيال بحالة تعب و الطفل بطنو بيوجعـــو
قلي ب"أنشوراج" في عـــنا عـرب عندن محـــــــلات بوسط مـيدانـــها من مصر من لبنان والسوري هرب وســـتين ألــــف بيطلعو ســـــكانها
مجبـــــــور اني خَـبِّرك بالمخــتصر كعــــدان بــدو أجنبيه للـــــــزواج شو صار مع غيرو كأنو ما اعــتبر والمشكله ما بظن في إلها عــلاج
ما بحـــط عيب بأجنبيه في الحياة و ما في تفاضل للعـــــرق بيناتـنا و كل مجتمع بالكون عــاداتو ثبات و عــاداتهم يا جــار مش عـاداتنا
و ع أول الدبكه مسك عـــمك جليل حدو بو يوسف والشباب الحاشيه بعرس اســــعد دق ع طبلو خـــليل و عــــمتك ظريفه ضَيّعت بالقافية
ونكته متل ما بتعرف فنون الشباب بالندب فاتو عالعرس ما في حـداد نــــــدبو العزوبيه و ليالي الاكتئاب و بمطلع الندبه برع احــــمد عماد
قال :
يا اسعدنا شو اللي صابك دمعت عــــيوني بمصابـك
عين تبكي العــــــــزوبيه و عين ع زهـــرة شـبابك
كنـــــت تبتـــدع الـــدواهي و تبرم بكل المــــــــــقاهي وعن صنوف الدهر ساهي و صرت مسجون بزواجـك
كنت تتـــــــــباهى بشطاره تزوغ من حـــــارة لحـاره و هلق تــــــــــذوق مراره الشوبك بيلهب جــــــــنابك =======
ملاحظة: مدينة "انشوراج" عاصمة ولاية الاسكا و فيها جالية عربية صغيرة (49 شخص) من لبنان و مصر و لديهم 8 محلات تجارية و مطعم في وسط المدينه.يقصدها بعض التجار العرب لشراء فراء الدب و الذئب من الهنود الحمر و أول من دخلها من العرب عائلة شبلي و هم من بلدة القرعون في لبنان العام 1949 و يعودون الى عائلة فارس ، و 6 منهم في وظائف عاليه جداً بحكومة الولاية التي اشترتها اميركا من امبراطور روسيا ب 80 الف دولار و اكتشفت فيها منابع نفط غزيره تمثل الاحتياط الاستراتيجي الأميركي ، أما عائلة عاشور الفلسطينية فقد انتقلت منها الى اتاباسكا قرب ادمنتون ليلتحق الأبناء بالجامعة